ქუთაისიპოსტი

"ნაციონალური მოძრაობის" ქუთაისის ორგანიზაციის ერთ–ერთი ლიდერი გიგა შუშანია ქუთაისის მერიას სამუშაო ჯგუფის შექმნისკენ მოუწოდებს, რომელიც ქალაქში არსებული სატრანსპორტო პრობლემების მოგვარებაზე იმუშავებს.
ამის შესახებ შუშანიამ პრესკლუბ მედიარუმში გამართულ ბრიფინგზე განაცხადა.

მოძველებული და არაადაპტირებული ტრანსპორტი, სამარშრუტო ხაზები და  ღამის საათებში მუშაობის პრობლემა – ეს იმ საკითხების არასრული ჩამომონათვალია, რომელიც გიგა შუაშანიას განცხადებით, ქალაქში საზოგადოებრივი ტრანსპორტის მიმართულებით დგას.  შუშანიას თქმით, ტრანსპორტის პრობლემა მათი მმართველობის დროსაც იყო აქტუალური, თუმცა, ამბობს, რომ მისი მოწესრიგება 2012 წელს ჰქონდათ დაგეგმილი, რომელიც "ოცნების" ხელისუფლების მოსვლის შემდეგ ვერ განხორციელდა. 

"ახლა მნიშვნელოვანი ის კი არ არის, რომ ეს პრობლემა 10 წლის წინაც იყო, ახლა მთავარია  ამ პრობლემის მოგვარება.  მოვუწოდებთ მერიას,  შეიქმანს სამუშაო ჯგუფი, რომელშიც ჩართული იქნებიან საკრებულს დეპუტატები, მერია და ამ მიმართულებით მომუშავე პირები. ვიცით, რომ 2019 წელს ზოგიერთ ხაზზე ტენდერების ვადა იწურება და მერია იძულებული გახდება გამოაცხადოს ახალი ტენდერი. მაგრამ, ამ დრომდე არ აქვთ წარმოდგენილი სამოქმედო გეგმა, თუ არ ჩავთვლით ქალაქის მერის სადღეგრძელოს, რომ უნდა მოაგვაროს პრობლემა.  თუმცა, მერის მოადგილე სხვას ამბობს, ტრანსპორტის განყოფილების უფროსი სხვას. არ აქვთ დათვლილი ხარჯები ", –  განაცხადა "მერდიარუმში" გიგა შუშანიამ.

საკრებულოს "ნაციონალი"  დეპუტატი ირწმუნება, რომ მერიის მიერ გაჟღერებული მუნიციპალური ტრანსპორტის იდეა  ქალაქისთვის მიზანშეწონილი არ არის, რადგან მისი თქმით, ამით ქალაქის ბიუჯეტი დაზარალდება. 

შეიქმნება თუ არა ქუთაისის მერიაში სამუშაო ჯგუფი  ტრანსპორტის  პრობლემის მოსაგვარებლად  და რა პასუხი აქვთ  შუშანიას განცხადებაზე, მერიაში ამბობებ, რომ ტრანსპორტის სამსახურის წარმომადგენლი განმარტებას მოგვიანებით გააკეთებს.