ქუთაისიპოსტი

ეკონომიკის მინისტრმა ნათია თურნავამ,  პირველი თებერვლიდან რეგულარული ფრენების აღდგენასთან დაკავშირებით,  საქართველოსა და უცხო ქვეყნის მოქალქეებისთვის დაწესებულ ახალ რეგულაციებზე ისაუბრა.

„პირველი თებერვლიდან  რეგულარული ფრენების აღდგენასთან ერთად, საქართველოს მოქალქეებისთვის ხდება წესების შემსუბუქება, კერძოდ, მათ ექნებათ არჩევანის უფლება, შემოვიდნენ ქვეყანაში ნეგატიური ტესტით და ძველებურად თვითიზოლაციაში გადაინაცვლონ ან  თვითიზოლაციის ნაცვლად, მესამე დღეს საკუთარი ხარჯით კიდევ ერთი PCR ტესტი ჩაიტარონ და თავისუფლები იქნებიან თვითიზოლაციიდან. ხოლო იმ მოქალაქეებისთვის, რომლებსაც ქვეყანაში შემოსვლისას არ ექნება ნეგატიური PCR  ტესტი, 12 ის ნაცვლად 8 დღიანი თვითიზოლაცია წესდება.

რაც შეხება უცხო ქვეყნის ვიზიტორებს, ნებისმიერი ტიპის ვაქცინის სრული კურსის ჩატარების შემთხვევაში, რაც ნიშნავს ორ დოზას, შესაბამისი დამადასტურებელი დოკუმენტის საზღვარზე წარდგენით, ყველა ქვეყნის მოქალაქეს უპირობოდ შეეძლება საქართველოში შემოსვლა. რაც შეეხება არავაქცინირებულ ვიზიტორებს, ევროკავშირის, ისრაელის, შვეიცარიის, აშშ-ს, საუდის არაბეთის, არაბთა გაერთიანებული საემიროებისა და ბაჰრეინის მოქალაქეებს ქვეყანაში შემოსვლა შეეძლებათ ბოლო 72 საათში გაკეთებული PCR  ტესტის ნეგატიური პასუხით, ხოლო მესამე დღეს სავალდებულოდ ჩაიტარონ PCR  ტესტი. ანუ ჩვენ აქ თვითიზოლაციის ვალდებულებას ვაუქმებთ. ამასთანავე,  მივმართავთ ავიაკომპანიებს, თვითმფრინავში არ დაუშვან უცხო ქვეყნის ის მოქალაქეები, რომლებსაც არ ექნებათ ბოლო 72 საათში ჩატარებული PCR  ტესტის ნეგატიური პასუხი ან კოვიდვაქცინის დამადასტურებელი დოკუმენტი“, -განაცხადა ნათია თურნავამ.

მან ასევე ისაუბრა ეკონომიკის მაჩვენებლის წინასწარ პროგნოზზე და განაცხადა, რომ მოსალოდნელია მისი 6%-ით შემცირება, რასაც მინისტრი პანდემიას უკავშირებს.