მაღაროელები ქალაქიდან გასასვლელების პიკეტირებას იწყებენ.

"ვაცხადებთ უვადო, გრძელვადიან ბრძოლას. ხვალიდან გადავდივართ საზღვრების პიკეტირების რეჟიმზე. აქ, მერიასთან აღარ იქნება ყოველდღიური აქციები. მთელი რესურსი იქნება მიმართული ცხელ წერტილებში. ასევე, იქნება შესაბამისი ჯგუფი, რომელიც საჭიროების შემთხვევაში ობიექტებზე [ღია კარიერზე] ავა და იმოქმედებს შესაბამისად. არავის მივცემთ უფლებას, ჩვენი ბუნებრივი რესურსი გავიდეს ჭიათურის გარეთ", - განაცხადა აქციაზე პროტესტის საინიციატივო ჯგუფის წევრმა ტარიელ მიქაცაძემ.

აქციის მონაწილეებმა კიდევ ერთხელ გააჟღერეს მოთხოვნები, რომელთა შორის პირველია სამი თვის სახელფასო დავალიანების გასტუმრება. ჭიათურელები, ასევე ითხოვენ კომპანია "ჯორჯიან მანგანეზის" ქალაქიდან გასვლას, მის წინააღმდეგ გამოძიების დაწყებას და მაღაროების ნაციონალიზაციას.

ჭიათურაში ერთი თვეა საპროტესტო აქციები მიმდინარეობს. მაღაროელებმა, რომლებთან შესახვედრად "ქართული ოცნების" არც ერთი წარმომადგენელი არ ჩავიდა, თავად გადაწყვიტეს დედაქალაქში წასვლა, თუმცა, არც თბილისში ხუთდღიანმა აქციებმა გამოიღო შედეგი. პროტესტის მონაწილეები, ჭიათურის კრიზისთან დაკავშირებით შექმნილი სამუშაო ჯგუფის შეხვედრაზეც კი არ მიიწვიეს. 29 მარტს, მაღაროელები ისევ ჭიათურაში დაბრუნდნენ და მორიგი საპროტესტო აქცია გამართეს.