"ქართული ოცნების" პარლამენტის
თავმჯდომარემ, საზოგადოებრივი მაუწყებლის ეთერში, ჭიათურაში შექმნილ
კრიზისზე დასმულ შეკითხვას უპასუხა.
შალვა პაპუაშვილი ქვეყანაში არსებულ სოციალურ პროტესტებს უცხოეთიდან
დაფინანსებულ ორგანიზაციებს უკავშირებს და ამბობს, რომ ცალკეული
ბიზნესაქტივისტები სოციალურ უკმაყოფილებას ახალისებენ, რეალურად კი
უმუშევრობის და სიღარიბის დონე ყოველწლიურად მცირდება.
"ჩვენი მთავარი საზრუნავი არის
თითოეული ჩვენი მოქალაქე და ეს არის, რასაც აკეთებს "ქართული
ოცნება" 2012 წლიდან მოყოლებული. ამას რომ ვაკეთებთ, იმიტომ
არის, რომ ჩვენთან უმუშევრობა 27%-დან 11 %-მდე ჩამოვიდა და ჩვენ
არჩევნებზე იმ დაპირებით გავედით, რომ 4%-მდე ჩამოვიყვანთ
უმუშევრობას. ამის გამოა, რომ ჩვენთან სიღარიბე 30%-დან 11%-მდე
ჩამოვიდა და ჩვენ 2028 წლამდე ვაპირებთ, რომ 14%-მდე დავწიოთ ეს
მაჩვენებელი.
მთელი ჩვენი საზრუნავი სინამდვილეში ეს არის და ჩვენ ვართ ყველაზე
მეტად დაინტერესებული, რომ ჩვენი მოქალაქეები არ დარჩნენ უმუშევარი.
[...] მინდა, მათ შორის მაღაროელებსაც და ჭიათურელებს ვუთხრა, რომ
საქართველოს მთავრობა ზრუნავს ამაზე. [...] ეს არ არის ჩვენი, რაღაც
სპორადული და მომენტიდან გამომდინარე ზრუნვა, ეს ნაწილია ჩვენი
პოლიტიკის. ამიტომ ვთქვი, რომ ჩვენთვის სამუშაო ადგილების შექმნა არის
ამოცანა. ჩვენთვის ეკონომიკური განვითარება არის ეროვნული ინტერესის
დონეზე აყვანილი. ჩვენ თუ ეკონომიკურად არ განვვითარდით, თუკი
თითოეული მოქალაქის კეთილდღეობა არ აიწია, დავივიწყოთ საუბარი
ნებისმიერი წარმატებული გაერთიანების წევრობაზე, არავის არ ვჭირდებით
ჩვენ, ჩვენ თუ ვიყავით ღარიბი ქვეყანა, ეს არის ჩვენი ეროვნული
ინტერესი და ზუსტად ამიტომ, არიან ძალები, რომლებიც ამას
ურტყამენ.
ვხედავთ, ჩვენ კვლავ, გარკვეული ორგანიზაციები, უცხოეთიდან
დაფინანსებული, გარკვეული ბიზნესაქტივისტები და არა ბიზნესმენები,
რომლებიც შეკრებილი არიან ცალკეული აქტივისტის გარშემო, იბრძვიან
იმისთვის, რომ რაიმენაირად დააზიანონ ჩვენი ეკონომიკა, წაახალისონ
სოციალური უკმაყოფილება. ეს ყველაფერი არის ნაწილი, საქართველოს
სუვერენიტეტზე თავდასხმისა, რომ ჩვენი ეროვნული ინტერესი იყოს
ხელყოფილ. [...] მე მინდა ყველა დავარწმუნო, რომ ამ ქვეყანაში, თუკი
ვინმე ზრუნავს თითოეულ მაღაროელზე, მეშახტეზე, არის საქართველოს
ხელისუფლება", - განაცხადა შალვა პაპუაშვილმა საზოგადოებრივი
მაუწყებლის ეთერში.
ჭიათურაში ერთი თვეა საპროტესტო
აქციები მიმდინარეობს. მაღაროელებმა, რომლებთან შესახვედრად "ქართული
ოცნების" არც ერთი წარმომადგენელი არ ჩავიდა, თავად გადაწყვიტეს
დედაქალაქში წასვლა, თუმცა, არც თბილისში ხუთდღიანმა აქციებმა გამოიღო
შედეგი. პროტესტის მონაწილეები, ჭიათურის კრიზისთან დაკავშირებით
შექმნილი სამუშაო ჯგუფის შეხვედრაზეც კი არ მიიწვიეს. 29 მარტს,
მაღაროელები ისევ ჭიათურაში დაბრუნდნენ და პროტესტს მერიის შენობასთან
აგრძელებენ.
ამ დრომდე შეუსრულებელია მათი ორი მთავარი მოთხოვნა:
მაღაროების მმართველი კომპანიისგან სამთვიანი დავალიანების გასტუმრება
და "ჯორჯიან მანგანეზისთვის" მადნის მოპოვების ლიცენზიის
ჩამორთმევა.
ამავე თემაზე:
"ჩაგვრთონ კომისიაში" - მაღაროელები სამმხრივი ფორმატის შეხვედრებს
უნდობლობას უცხადებენ
მაღაროელების აქცია ჭიათურიდან დედაქალაქში
ინაცვლებს
მაღაროელები მიხეილ ყაველაშვილს წერილს უგზავნიან და
ჭიათურაში ჩასვლა სთხოვენ
მაღაროელები "ქართული ოცნების"
მთავრობის წარმომადგენლებთან შეხვედრას
ითხოვენ
"მიწისქვეშა მოპოვება წამგებიანია" - "ჯორჯიან
მანგანეზის" პასუხი მაღაროელებს
ჭიათურელი მაღაროელები "ჯორჯიან მანგანეზთან"
მოლაპარაკებას არ აპირებენ
"წავიდეს ინვესტორი"! - ჭიათურელი მაღაროელების
ექვსპუნქტიანი მოთხოვნა
ჭიათურის კრიზისი
"ორშაბათს თუ კონკრეტული ნაბიჯები არ
გადაიდგმება, გავაჟღერებთ ჩვენს მოთხოვნებს"
"თუ დაიძაბა სიტუაცია, შეიძლება ამ თვის ხელფასიც
ჩარიცხონ" - საპროტესტო აქცია ჭიათურაში
ჭიათურელ მაღაროელებს თითქმის განახევრებულ
ხელფასს ისევ უგვიანებენ
„შავი ოქრო“ მდიდრებს - ჭიათურის
პარადოქსი
მასალის გამოყენების პირობები