ქუთაისში მასწავლებლების მარში გაიმართა.

სხვადასხვა სკოლის 30-მდე მასწავლებელი. ისინი ხელისუფლების მიერ საგარეო კურსის ცვლას, გაყალბებულ არჩევნებს და დემონსტრანტებზე ძალადობას აპროტესტებს.

მასწავლებლების განცხადებით ევროკავშირზე უარის თქმა, საქართველოს სუვერენიტეტს უქმნის საფრთხეს,
ქვეყანას იზოლაციაში ტოვებს და რუსეთის ორბიტაში აბრუნებს

„ჩვენ თუ დღეს არ ვიბრძოლეთ, ხვალ უფლება არ გვექნება გაკვეთილზე შევიდეთ და ბავშვებს რაიმე ვასწავლოთ და რაიმეს გაკეთება მოვთხოვოთ“, - ამბობს მასწავლებელი მარი ჩიტაიშვილი.




ქუთაისში პროტესტი არ წყდება. აქტივისტები ქალაქის ცენტრალურ ნაწილში ყოველდღიურად იკრიბებიან და "ქართული ოცნების" მიერ არჩევნების გაყალბებას და საგარეო კურსის ცვლილებას აპროტესტებენ. დემონსტრანტები ვადამდელი არჩევნების ჩატარებას ითხოვენ.
უწყვეტი პროტესტი მიმდინარეობს ქვეყნის მასშტაბით. მოქალაქეები რიგგარეშე არჩევნების დანიშვნას მოითხოვენ თავიანთ ქალაქებსა და ადმინისტრაციულ ცენტრებში. აქციის მონაწილეებს სასტიკი მეთოდებით უსწორდება სპეციალური დანიშნულების რაზმი დედაქალაქში. დემონსტრანტებს სცემენ დაკავების დროს და როგორც ისინი ჰყვებიან, დაკავების შემდეგაც. ფიზიკურად უსწორდებიან მედიის წარმომადგენლებს. აქციების დროს დაშავდა და მძიმე დაზიანება მიიღო ასობით დემონსტრანტმა და ათობით ჟურნალისტ-ოპერატორმა. ერთ-ერთმა სპეცრაზმმელმა პირდაპირ ეთერში სცემა ტელეკომპანია "ფორმულას" ჟურნალისტს გურამ როგავას, რის შედეგადაც მან სახისა და ხერხემლის დაზიანებები მიიღო. გუშინ, 2 დეკემბრის აქციაზე სასტიკად ნაცემი 22 წლის ახალგაზრდა ამ დრომდე კომატოზურ მდგომარეობაშია.

საქართველოში საპროტესტო ტალღა, რომელიც ყოველდღიურად უფრო მზარდი ხდება, 28 ნოემბერს, მას შემდეგ დაიწყო, რაც "ქართული ოცნების" პრემიერ-მინისტრმა ირაკლი კობახიძემ განაცხადა, რომ ქვეყანა ევროკავშირში ინტეგრაციის პროცესს 2028 წლამდე აჩერებს.