"ვაგრძელებთ ბრძოლას, რომელიც იქნება უკომპრომისო, რადგან ამ არჩევნებზე ჩვენ გაგვქურდეს",- განაცხადეს ქუთაისში, საპროტესტო აქციის მონაწილეებმა.

ქალაქის ადგილობრივი თვითმმართველობის შენობის წინ, ის ადამიანები შეიკრიბნენ, რომლებიც თვლიან, რომ 26 ოქტომბრის საპარლამენტო არჩევნები გაყალბდა. 

სამოქალაქო აქტივისტები, არასამთავრობო ორგანიზაციებისა და ოპოზიციური პოლიტიკური პარტიების წარმომადგენლები ამბობენ, რომ "ქართულმა ოცნებამ" ხმები დაშინების, ტოტალური გაყალბებისა და ხალხის დამცირების ხარჯზე მიიღო. სწორედ ამიტომ, მოქალაქეები მიიჩნევენ, რომ ეს არჩევნები არ წარმოადგენს ქართველი ხალხის ნებას და მათი ნებაა, გავხდეთ ევროკავშირის წვერი ქვეყანა. 

"აქ ვარ იმიტომ რომ, ქართველ ხალხს მოგვპარეს არჩევანი. დღეს ცხადი გახდა, რომ აზრი არ აქვს ამ ქვეყანაში არჩევნებს, რადგან რასაც უნდა, როგორც უნდა, ისე დაწერს ბიძინა ივანიშვილი, ირაკლი კობახიძე და კალანდარიშვილი",- განაცხადა სამოქალაქო აქტივისტმა ვალერი თევდორაძემ.

საპროტესტო აქციის მონაწილეები მოითხოვენ, დადგინდეს, რატომ არის ასეთი დიდი სხვაობა ეგზიპტოლისა და ცესკოს შედეგებს შორის, რადგან მიაჩნიათ, რომ ხალხს, რომელმაც იცხოვრა საბჭოთა კავშირში და იცის, რა არის რუსული მარწუხები, შეუძლებელია ისევ ეს ხელისუფლება აერჩია.

"დასადგენია ყველა ის პრეცედენტი, რომელიც ხელს უშლიდა თავისუფალი ნების გამოხატვას. გამოსაძიებელია ყველა იმ ადამიანის, მათ შორის, ცესკოს და მისი თანამშრომლების პასუხისმგებლობა, ასევე ადმინისტრაციების და საჯარო მოხელეების, რომლებიც პირდაპირ იყვნენ ჩართული არათანაზომიერად ამ პროცესში. ახლა, ჩვენ უნდა დავადგინოთ, მართალი არის თუ არა ის ციფრი, რომელსაც წერს ცესკო და საქართველოს 54%-მა მართლა უთხრა თუ არა უარი ევროინტეგრაციას და მზად არის მიუბრუნდეს რუსეთს",- განაცხადა ა/ო "თაობათა დიალოგის" თავმჯდომარემ ნუგზარ კოხრეიძემ.




26 ოქტომბრის არჩევნების შედეგების გასაპროტესტებლად, ქუთაისის პარლალურად, დიდი აქცია გაიმართა თბილისში. რუსთაველზე, პარლამენტის წინ, ათობით ათასი მოქალაქე მივიდა. გაყალბებული არჩევნები ემიგრანტებმა მსოფლიოს სხვადასხვა ქალაქშიც გააპროტესტეს. 

საქართველოს ცენტრალური საარჩევნო კომისიის მონაცემებით, არჩევნებში მმართველმა პარტიამ ხმების 53%-ზე მეტი მიიღო, "კოალიცია ცვლილებისთვის გვარამია, მელია, გირჩი, დროამ" – 11,035%; 
"ერთიანობა – ნაციონალურმა მოძრაობამ" – 10.167%; "ძლიერმა საქართველომ – ლელო, ხალხისთვის, თავისუფლებისთვის" – 8,81% და პარტიამ "გახარია საქართველოსთვის" - 7.768%.

საქართველოში საპარლამენტო არჩევნები მასობრივი დაშინებისა და მოსყიდვის ფონზე ჩატარდა. საარჩევნო უბნებთან მობილიზებული იყვნენ მმართველი პარტიის მიერ დაქირავებული პირები, რომლებიც ზეწოლას ახორციელებდნენ ამომრჩევლებზე, სიტყვიერად და ფიზიკურად ძალადობდნენ მედიის წარმომადგენლებზე.