"თეატრი უნდა იყოს თავისუფალი",- ამბობს რეჟისორი ლევან ბიბილეიშვილი.

პატარა ქალაქების თეატრები მთლიანად სახელმწიფო ან მუნიციპალურ მხარდაჭერას საჭიროებს, ქუთაისში ვერ დამკვიდრდა დამოუკიდებელი თეატრები, რომლებიც კონიუნქტურიდან თავისუფალ იდეებს განახორციელებდნენ. დასავლური მოდელის თეატრი ასეთია - ის ახერხებს სახელმწიფოსგან დამოუკიდებლად არსებობას, ამბობს ლევან ბიბილეიშვილი.

"ადრე თითქოს იყო საუბარი დასავლური მოდელის შემუშავებაზე, ანუ სახელმწიფოს მხარდაჭერით ბიზნესის და ხელოვნების კავშირზე. ბიზნესი რაღაც გადასახადებიდან თავისუფლდებოდა თუკი ხელოვნებას დაუდგებოდა გვერდით. მაგრამ ეს ინიციატივა შეაჩერეს".

რეჟისორს მიაჩნია, რომ დღეს შეიძლება ბიზნესი აფინანსებდეს რაიმე სახელოვნებო პროექტს, მაგრამ ეს მაინც არის პირადი ნაცნობობისა და ავტორიტეტის ხარჯზე.

"მყარი, კონკრეტული პროექტების სახით ქართული ბიზნესფონდები ნაკლებად მუშაობენ, სადაც ბევრი ადამიანი თავის ინიციატივას განახორციელებდა. ბიზნესი მოკავშირე უნდა იყოს სახელმწიფოსი და ორივე უნდა უწყობდეს ხელს ადამიანის ხელმისაწვდომობას კულტურაზე, მედიცინასა თუ სხვა სფეროზე. საიმისოდ, რომ ადამიანმა შეძლოს ცხოვრება, აზროვნება ისე, რომ მის ცხოვრებას რაღაც აზრი ჰქონდეს", - ამბობს ლევან ბიბილეიშვილი.