"სტენსილი ეძღვნება მედიის თავისუფლებას" - ასე ახსნა სტრიტ არტისტმა გიორგი გაგოშიძემ (გაგოშამ) ქუთაისში განთავსებული ახალი სტენსილის იდეა. 

სტენსილი, რომელიც რომელიც მედიის ადვოკატირების კოალიციასთან პარტნიორობითა და აირექსის მხარდაჭერით შეიქმნა, ალეგორიულია. მასზე ცხოველებია გამოსახული, რომლებიც ჟურნალისტებს განასახიერებენ.

"მინდოდა ჟურნალისტები ყოფილიყვნენ ისეთი გმირები, რომლებიც ყველას შეუყვარდებოდა", - ამბობს ავტორი.

გიორგი გაგოშიძე ამ ფორმით გამოხატავს მხარდაჭერას მედიის მიმართ, რომელიც ბოლო პერიოდში განსაკუთრებული წნეხის ქვეშ არის და დიდ ზეწოლას განიცდის ხელისუფლების მხრიდან.

ხელოვანის თქმით, თავისუფალი მედია მთავარი საყრდენია დემოკრატიის, ამიტომ მნიშვნელოვანია მისი მხარდაჭერა.

"მედიის მთავარი როლი და ფუნქცია არის იყოს საზოგადოების ინტერესების სადარაჯოზე. აცნობოს საზოგადოებას დროულად ინფორმაცია, ანალიზი, თუ რა ხდება, რა გამოწვევებია, რა გამოსავალია და ა.შ. თუ გადავხედავთ ჩვენი დამოუკიდებლობის ისტორიას, მთელ რიგ პროგრესში, რაც ქართულმა საზოგადოებამ მიაღწია დემოკრატიისა თუ ევროინტეგრაციის გზაზე, ლომის წილი აქვს მედიას,"- აღნიშნა მედიის ადვოკატირების კოალიციის თავმჯდომარემ, მამუკა ანდღულაძემ.