ნანუკა ქობულაძე ერთ-ერთია იმ ახალგაზრდებს შორის, რომლებსაც ვიზალიბერალიზაციის მიღებამ ევროპის ქვეყნებში მოგზაურობისა და განვითარებისთვის გზა გაუხსნა.

ნანუკა არაფორმალური განათლების მიმართულებით, ახალგაზრდებისთვის ტრენინგებს 2015 წლიდან ატარებს. ის ერაზმუს+ პროგრამის მეშვეობით, 14-ზე მეტ ქვეყანაში იმყოფებოდა.

გვიყვება, რომ რამდენიმეკვირიანი გაცვლითი პროგრამების მეშვეობით, ეცნობოდა სხვადასხვა ქვეყნის კულტურას, ტრადიციებს, იზიარებდა მათ გამოცდილებას, მიღებულ ცოდნას კი, საქართველოში დაბრუნებული, თავის თანატოლებს უზიარებდა.

"როცა ვიზალიბერალიზაცია მივიღეთ, პირველი ქვეყანა ბრიუსელი იყო, სადაც ერაზმუს+ პროგრამის მეშვეობით წავედით. ძალიან ბევრი რამ გავიგე მაშინ ევროპის შესახებ, ამის შემდეგ არ გავჩერებულვარ, სულ ვარ აღმოჩენების ძიებაში",- ამბობს ნანუკა ქობულაძე.

დამოუკიდებლობა, თავისუფლების სიყვარული, განსხვავებული აზრის მიმღებლობა, ადამიანის უფლებების წინ წამოწევა - ეს ის ფუნდამენტური ღირებულებებია, რომელიც ნანუკამ ევროპის ქვეყნებში ყოფნისას დაინახა. ამიტომ მიიჩნევს, რომ მისთვის ევროპა ასოცირდება განვითარებასთან, მიზანსწრაფულობასთან, პიროვნების შესაძლებლობების მაქსიმალურად წინ წამოწევასთან:

"ევროპამ უფრო დამაჯერა ჩემს შესაძლებლობებში, დამოუკიდებლობაში, დამანახა, რომ შემიძლია ბევრი გამოწვევა დავძლიო. ამიტომ, როცა ვსაუბრობ ევროპაზე, ჩემთვის ის არის მთავარი მამოძრავებელი, როგორც არაფორმალური განათლების მხრივ, ასევე ყველა იმ ღირებულისთვის, რაც ჩვენთვის მნიშვნელოვანია".