ქუთაისში არსებული სამეცნიერო-ინტელექტუალური კლუბი „თაობათა დიალოგი“, რომელიც ახალგაზრდული მიმართულებით მუშაობს, საერთაშორისო გაცვლით პროგრამებს, ახალი თაობებისთვის საჭირო უნარ ჩვევების განსავითარებლად, წლებია, აქტიურად ახორციელებს.

მათ შორისაა Erasmus+_ის საგანმანათლებლო გაცვლითი პროგრამა, რომლის განხორციელებაც RICDOG-მა სწორედ იმ მიზნით დაიწყო, რომ ახალგაზრდებს პიროვნული კომპეტენციები განევითარებინათ, მეტად აქტიურები გამხდარიყვნენ და საზოგადოებაში თავიანთი როლის შესახებ სცოდნოდათ.

საფრანგეთი, საბერძნეთი, პოლონეთი, პორტუგალია, ესპანეთი, ესტონეთი და სხვა - ეს ევროპის ის განვითარებული ქვეყნებია, სადაც ახალგაზრდები სხვადასხვა ეროვნებისა და კულტურის მქონე თანატოლებს ხვდებიან, ერთმანეთს გამოცდილებას უზიარებენ და შემდგომ, უკან სულ სხვა ღირებულებებითა და  ფასეულობებით აღჭირვილნი ბრუნდებიან.

RICDOG-ის საპატიო გენერალური მდივანი და Erasmus+_ის კოორდინატორი ლანა თოთაძე ამბობს, რომ ორგანიზაციამ, 15 წლის განმავლობაში, საზღვარგარეთ, გაცვლითი პროგრამით 200-მდე ახალგაზრდა გაგზავნა.

"ევროკავშირი, Erasmus+_ის მეშვეობით, ახალგაზრდებს შესაძლებლობას აძლევს, უსასყიდლოდ წავიდნენ ევროპის სხვადასხვა ქვეყანაში, თავიანთი გამოცდილება გაუზიარონ სხვებს, ახალი ცოდნით, უნარებით უკან დაბრუნდნენ და თავიანთ თემში იყვნენ აქტიური მოქალაქეები. პროგრამის მიზანიც სწორედ ესაა: ახალგაზრდების გააქტიურება და მათი ჩართვა გადაწყვეტილების მიღების პროცესში, როგორც ადგილობრივ, ისე ეროვნულ თუ საერთაშორისო დონეზე",- ამბობს ლანა თოთაძე. 

მისივე თქმით, Erasmus+ ბევრ მიმართულებას მოიცავს: სხვადასხვა ხანგრძლივობის ტრენინგებსა თუ სასწავლო კურსებს, რომლებიც შინაარსით ერთმანეთისაგან განსხვავდება, თუმცა ყველა პროგრამას ერთი რამ აერთიანებს: ისინი ორიენტირებულები არიან ახალგაზრდების განვითარებაზე. 

"შესაბამისი კვალიფიკაციის მქონე ტრენერები, არაფორმალური განათლების გზით, ახალგაზრდულ მუშაკებს კონკრეტული თემის ირგვლივ აწვდიან ინფორმაციას. ამ პროგრამებიდან დაბრუნების შემდეგ, ახალგაზრდები ხდებიან უფრო მეტად აქტიურები, კომუნიკაბელურები, პრეზენტაბელურები, მიმღებლები და კონკურენტუნარიანები დასაქმების ბაზარზე. ამასთან, ისინი თავიანთ თანატოლებთან ურთიერთობის პროცესში სოციალურ უნარებს სწავლობენ, რაც მეტად მნიშვნელოვანია",- ამბობს ლანა თოთაძე.



Erasmus+ ევროკავშირის საგრანტო პროგრამაა, რომელიც ახორციელებს პროექტებს განათლების, ტრენინგის, ახალგაზრდობისა და სპორტის მიმართულებით. პროგრამის მიზანია განათლების მოდერნიზება, ცოდნის და დასაქმების დონის ამაღლება, ასევე, ტრენინგები და ახალგაზრდებთან მუშაობა.

2021-2027 წლებში პროგრამის ბიუჯეტი €26 მილიარდი ევროთი განისაზღვრება.