ქუთაისს რომ განახლებული ასსაფეხურიანი კიბეები აქვს, ევროკავშირის ფინანსების დამსახურებაა, თუმცა ესეც, ბევრ სხვა განხორციელებულ პროექტთან ერთად, ადგილობრივებს ბიუჯეტიდან დაფინანსებული ჰგონიათ.

კიბეების რესკონსტრუქციის დაპირებას ადგილობრივი თვითმმართველობა 2018 წლიდან გასცემდა. თუმცა, მერიამ პირობის შესრულება 2021 წელს შეძლო, ისიც, მას შემდეგ, რაც პროექტი ევროკავშირმა დააფინანსა.

თავდაპირველად, ადგილობრივ თვითმმართველობაში აცხადებდნენ, რომ ერთადერთი შემაფერხებელი მიზეზი კიბის მიმდებარედ არსებული ის მიწის ნაკვეთი იყო, რომელიც სახელმწიფო ბალანსზე ირიცხებოდა, ეკონომიკის სამინისტრო კი ტერიტორიის გადაცემაზე უარს აცხადებდა. საბოლოოდ, უწყებამ მიწის ნაკვეთი, 2019 წლის მარტში, კერძო პირზე გაასხვისა.

შემდეგ, მერიამ ვერც სამუშაოების მარტივად დაპროექტება მოახერხა. ადგილობრივ თვითმმართველობას ამისთვის ტენდერის სამჯერ გამოცხადება და საპროექტო ღირებულების გაზრდა დასჭირდა. მესამე მცდელობაზე მერიამ ხელშეკრულება შპს "გეოანალიტიკასთან" გააფორმა, თუმცა ეს ტენდერიც, მისივე ინიციატივით, მალევე ჩაიშალა. ამის შემდეგ მერიას პროექტის განხორციელებაზე ზრუნვით თავი აღარ შეუწუხებია.

ადგილობრივ თვითმმართველობაში ყოველ წელს ირწმუნებოდნენ, რომ კიბეების რეკონსტრუქციისთვის საკმარისი თანხა, ერთი მილიონი ლარი ჰქონდათ მობილიზებული, თუმცა, 2021 წლის ივნისში გაირკვა, რომ მერიამ, ობიექტის რეაბილიტაციის პროექტი, დაფინანსების იმედით, ევროკავშირის საგრანტო კონკურსზე გაიტანა.

საბოლოოდ, კიბეების რეკონსტრუქცია ევროკავშირის საგრანტო კონკურსის ფარგლებში დაფინანსდა, რის შემდეგაც მერიამ ტენდერი გამოაცხადა.

ამდენად, კიბეების რეკონსტრუქციისთვის საჭირო ხარჯები, ადგილობრივი ბიუჯეტის ნაცვლად, ევროკავშირმა, საგრანტო კონკურსის ფარგლებში, გაიღო, რისთვისაც 741 098 ლარი დაიხარჯა.