ქუთაისში, ერთ-ერთი ყველაზე დიდი ქუჩის - ნიკეას რეკონსტრუქციის პროექტი, რომელიც მსოფლიო ბანკის ფინანსური მხარდაჭერით შესრულდა, ადგილობრივების უმრავლესობას, მერიის დაფინანსებული ჰქონია.

ქუჩის რეკონსტრუქციიდან 8 წლის შემდეგაც, მოსახლეობას არ აქვს ინფორმაცია საერთაშორისო დონორი ორგანიზაციის ფინანსურ მხარდაჭერაზე.

ნიკეას ქუჩის 2.2 კმ. სიგრძის, სამზოლიან გზას სრული რეკონსტრუქცია 2016 წელს ჩაუტარდა.

სარეაბილიტაციო სამუშაოები 2015 წლის დეკემბერში დაიწყო. მანამდე, ქუჩაზე არსებული გზის საფარი დაზიანებული და ამორტიზირებული იყო, რის გამოც, მოძრაობა ფერხდებოდა და მუდმივ საცობებს ქმნიდა. არ იყო დაცული უსაფრთხოების ნორმებიც. მსოფლიო ბანკის ფინანსური დახმარებით კი ქუჩა სრულად რეაბილიტირდა.

რეაბილიტაციის პროექტის ფარგლებში, დაიგო ორფენიანი ასფალტ-ბეტონის საფარი, სავალ ნაწილებს შორის გაკეთდა შემზღუდავი გამყოფი ზოლი, ქუჩის ორივე მხარეს მოეწყო ახალი ტროტუარები, შეიცვალა გარე განათება და გაკეთდა ახალი სანიაღვრე სისტემა.

ნიკეას ქუჩის რეკონსტრუქციისთვის მსოფლიოს ბანკმა 7 მილიონ 698 556 ლარი გამოყო.