ჭიათურელი მირანდა კაპანაძე, თავისუფალ ჭიდაობაში, საქართველოს ისტორიაში პირველი ქალი ევროპის ჩემპიონი გახდა.
მირანდამ, სერბეთის ქალაქ ნოვი სადში მიმდინარე ევროპის 17-წლამდელთა ჩემპიონატზე, ოთხი შეხვედრა ჩაატარა, ოთხივე მოიგო და ჩემპიონის ტიტული და ისტორიული ოქროს მედალი მოიპოვა.

მან ევროპის ჩემპიონატის ფინალის გზაზე ჩეხი ლანა პეზიჩი (8:0), ნეიტრალური გუნდის სახელით მოჭიდავე რუსი დოლჟონ ცინგუევა (8:6) და აზერბაიჯანელი ფიდან ბაბაევა (8:0) დაამარცხა. საჩემპიონო ბრძოლაში კი თურქ ოზლემ გურსოის (6:3) სძლია.

აღსანიშნავია, რომ აქამდე არც ერთ ასაკობრივ, მათ შორის საქართველოს ქალთა ეროვნულ ნაკრებს, ქალთა ჭიდაობაში, ამ რანგის შეჯიბრებაზე, ჩემპიონი არ ჰყოლია.

მირანდა კაპანაძე ჭიათურის 27-ე სპორტულ სკოლის აღსაზრდელია. მისი მწვრთნელები ოთარ ჯაოშვილი და თაკო სამხარაძე არიან.