ეროვნული ლიგის 28-ე ტურში, „ტორპედომ“ „საბურთალოს“ უმასპინძლა და ანგარიშით 5:0 დაამარცხა.
თამაში შენგელია-არენაზე გაიმართა, სადაც ქუთაისის საფეხბურთო კლუბმა პირველივე ტაიმში დიდი უპირატესობა მოიპოვა.

„ტორპედოს“ მოთამაშემ ლაშა შერგელაშვილმა საჯარიმო დარტყმით ანგარიში 25-ე წუთზე გახსნა. ოთხ წუთში კი გიორგი არაბიძემ „საბურთალოს“ კარი მეორედ აიღო. 43-ე წუთზე მისივე გადაცემით ირაკლი ბუღრიძემ მესამე გოლი გაიტანა და ქუთაისელებმა ტაიმი 3:0 მოიგეს.

მეორე ნახევარში ქუთაისელებმა მეტოქეს კიდევ ორი გოლი გაუტანეს. კერძოდ, გიორგი არაბიძემ 59-ე წუთზე პენალტით დუბლი შეასრულა, ხოლო საბოლოო ანგარიში 90+2-ე წუთზე „ტორპედოს“ სერბმა ლეგიონერმა ნიკოლა ნინკოვიჩმა დააფიქსირა.

28 ტურის შემდეგ, „საბურთალო“ 45 ქულით მესამე ადგილზე დარჩა, მაგრამ ქუთაისის „ტორპედომ“ (42) სხვაობა სამ ქულამდე შეამცირა და ევროსაგზურისთვის ბრძოლას განაგრძობს.