"ქართული ოცნების'' მიერ დაანონსებულ შეკრებაზე პარტიის აქტივისტები, საჯარო მოხელეები და სხვადასხვა სახელმწიფო ორგანიზაციის თანამშრომლები ქუთაისიდან თბილისში გაემგზავრნენ.

სამთავრობო ღონისძიება, თავისუფლების მოედანზე, 19:00 საათზეა ჩანიშნული, თუმცა ქუთაისიდან ავტობუსებისა და მიკროავტობუსების კოლონა დილის 10:00 საათიდან გავიდა. 

თბილისში წამსვლელ მოქალაქეთა ნაწილი ცენტრალურ მოედანზე, ე.წ კოლონადებთან იყო შეკრებილი, ნაწილი - სპორტის სასახლესთან და ზოგიც - ქალაქის სხვადასხვა ლოკაციაზე.

"ოცნების" საარჩევნო კამპანიის შემაჯამებელი შეხვედრის მონაწილეები ამბობენ, რომ თბილისში, მშვიდობის მხარდასაჭერად მიდიან, მშვიდობა კი, მათივე თქმით, მხოლოდ "ოცნების" ხელისუფლების პირობებშია შესაძლებელი. 

"საქართველოს მშვიდობას ვუჭერთ მხარს და არა ომს, ამიტომაც მივდივარ", - ამბობს ერთ-ერთი ადგილობრივი, რომელიც ქუთაისიდან თბილისში გაემგზავრა. 

იყვნენ ისეთებიც, რომლებიც თავს არიდებდნენ საუბარს და აგრესიას გამოხატავდნენ ჟურნალისტების დანახვაზე. 

"არაა შენი საქმე რატომ მივდივარ, რატომ უნდა გითხრა, ბიძაშვილი ხარ ჩემი, მამიდაშვილი, თუ ვინ ხარ",- გვითხრა შეკრების ერთ-ერთმა მონაწილემ.



მმართველი პარტია დღეს დაანონსებული შეკრებისთვის საგანგებოდ ემზადება და დედაქალაქში საჯარო მოხელეები და პარტაქტივი ჩამოჰყავს.

იმერეთის თორმეტივე მუნიციპალიტეტიდან, მსუბუქი ავტომობილებით, მიკროავტობუსებითა და ავტობუსებით ადამიანების ძირითადი ნაწილი უკვე დაიძრა თბილისიკენ.

საპარლამენტო არჩევნებამდე სამი დღით ადრე, დღეს, 23 ოქტომბერს, თბილისში, „ქართული ოცნების“ საარჩევნო კამპანიის შემაჯამებელი შეხვედრა იმართება. ღონისძიება, თავისუფლების მოედანზე, 19:00 საათზე დაიწყება.

აღსანიშნავია, რომ მმართველი პარტიის შემაჯამებელ ღონისძიებამდე, 20 ოქტომბერს, თბილისში, მსვლელობა „საქართველო ირჩევს ევროკავშირს“ გაიმართა, რომელშიც ათობით ათასი ადამიანი მონაწილეობდა.
ხუთი სხვადასხვა ადგილიდან, საქართველოს და ევროკავშირის დროშებით მსვლელობის შემდეგ, მოქალაქეები თავისუფლების მოედანზე შეიკრიბნენ, სადაც კონცერტი გაიმართა.