ქუთაისიპოსტი

ტყიბულში, სოხაძეების რვასულიანი ოჯახი, რომლებიც საკუთარ საცხოვრებელ სახლში ცოტა ხნის წინ  საგანგებო მდგომარეობის გამოცხადების გამო დაბრუნდნენ, უმუშევრები დარჩნენ.

ტყიბულის მერიაში ამბობენ, რომ საკითხს  სახელმწიფოს შესაბამისი უწყებები წყვეტენ. სოციალური მომსახურების სააგენტოს ტყიბულის რაიონულ განყოფილებაში კი გვითხრეს, რომ მთავრობისგან მითითებებს ელოდებიან.

„ჯერ არანაირი მითითება არ გვაქვს და ვეყრდნობით იმ ინფორმაციას, რაც მედიით ვრცელდება. 15 მაისისთვის უკვე იქნება მზად პორტალი, სადაც თვითდასაქმებულებს შეეძლებათ თავინთი მონაცემების გაგზავნა. ისინი კი  ვინც ამას ვერ შეძლებს, ჩვენთან დატოვებენ პირად მონაცემებს, მაგრამ ამ ეტაპზე ზუსტად არაფრის თქმა არ შემიძლია“,–ამბობს სოციალური მომსახურების სააგენტოს ტყიბულის რაიონული განყოფილების უფროსი რამაზ გაბრიაძე.

მიზნობრივი სოციალური დახმარების გეგმა ჯანდაცვის მინისტრმა, ეკატერინე ტიკარაძემ 29 აპრილს წარადგინა. სამთავრობო გეგმის მიხედვით, თვითდასაქმებულები ორ კატეგორიად დაიყოფიან: ფიქსირებული გადასახადის გადამხდელები და ფიზიკური პირები, რომლებიც შემოსავლების სამსახურში არ არიან რეგისტრირებული.
პირველი კატეგორიის პირები, რომელთა რაოდენობა ქვეყანაში 150 000 –მდეა,  სახელმწიფოსგან 300 ლარიან ერთჯერად დახმარებას ავტომატურად მიიღებენ და მათ შემთხვევაში მხოლოდ ანგარიშის ნომრის წარდგენაა საკმარისი. რაც შეეხება არარეგისტრირებულ თვითდასაქმებულებს, მათგან სახელმწიფო ეკონომიკური საქმიანობის დამადასტურებელი ცნობის წარდგენას ითხოვს. ამასთანავე, თვითდასაქმებულებმა მთავრობის პორტალზე www.moh.gov.ge, რომელიც 15 მაისიდან ამუშავდება, პერსონალური მონაცემები უნდა წარადგინონ.
მეორე კატეგორიის თვითდასაქმებულებისთვის ერთჯერადი 300 ლარიანი დახმარების გაცემის საკითხს მხოლოდ ამის შემდეგ განიხილავს სპეციალური კომისია  და გადაწყვეტილებას მიიღებს.