ქუთაისიპოსტი

სატრანსპორტო სქემა ოპტიმიზაციას საჭიროებს.

ეკონომიკისა და ტრანსპორტის განყოფილების წარმომადგენელი, დავით კბილაშვილი ამბობს, რომ პრობლემას მგზვართა ნაკადის ყოველდღური შემცირება ქმნის.

„ერთის მხრივ კარგია, რომ ადამიანები სახლში რჩებიან, მაგრამ მეორეს მხრივ, მგზავრთა ნაკადის კლების გამო ხარჯებსაც ვერ ანაზღაურებენ ავტობუსები. ამიტომ, საჭიროა კიდევ ერთხელ ოპტიმიზაცია. ხვალ, გადაზიდავი კომპანიების წარმომადგელბეთან მერიაში შეხვედრა შედგება, სადაც სწორედ ამ საკითხზე იქნება საუბარი. საჭიროა ინტერვალების დაზუსტება, ზოგ შემთხვევაში შესაძლოა გაიზარდოს ინტერვალები, მაგრამ მთავარია რომ იყოს ტრანსპორტი. ახლა ყველა მსხვილ უბანში მიდის ტრანსპორტი, თუმცა, კუპრაძის ქუჩაზე ნამდვილად არის პრობლემა“,–ამბობს დავით კბილაშვილი.

როგორ გადანაწილდება ავტობუსები ქალაქის მასშტაბით და დანიშნავს თუ არა ქუთაისის მერია კუპრაძის ქუჩაზე საავტობუსო ხაზს, სატრანსპორტო კომპანიების ხელმძღვანელებთან შეხვედრის დასრულების შემდეგ გაირკვევა.

ქუთაისში 18 მარტიდან საქალაქო მიკროავტობუსებით გადაადგილება აიკრძალა. ქალაქში მხოლოდ ავტობუსები მოძრაობენ. აკრძალულია საქალაქთაშორისო სატრანსპორტო და სარკინიგზო მიმოსვლაც.

შეზღუდვები ქვეყანაში კორონავირუსის გავრცელების პრევვენციას უკავშირდება.

ბოლო მონაცემებით საქართველოში ახალი Covid19–ით 81 ადამიანია ინფიცირებული. მათგან 13 უკვე გამოჯანმრთელდა. სავალდებულო კარანტინში 4505 ადამიანი იმყოფება, ხოლო სტაციონარში დაკვირვების ქვეშ 247 პირი.

მეხუთე დღეა კარანტინის რეჟიმი მოქმედებს ბოლნისსა და მარნეულში, სადაც შესვლა და გამოსვლა აკრძალულია. მუნიციპალიტეტების სურსათითა და პირველადი საჭიროების ნივთებით მომარაგება საპოლიციო კონტროლის ქვეშ ხდება.

Covid