ქუთაისიპოსტი

ქალაქში განთავსებული გასართობი საშუალებები დაზიანებულია. 

ქუთაისში არსებულ სკვერებსა თუ საცხოვრებელ ეზოებში ათეულობით საბავშვო ატრაქციონია განთავსებული, რომელთა უმრავლესობა მოსახლეობის მიერ დაზიანებულია.

"ატრაქციონებზე მოზრდილი ადამიანებიც ჯდებიან, რის გამოც ტყდება", - განმარტავენ ადგილობრივები. მწყობრიდან გამოსულ გასართობ საშუალებებს კი ამ დრომდე რეკონსტრუქცია არ უტარდებოდა.



ქალაქში განთავსებული ატრაქციონების გარდა, ბავშვებს კიდევ სხვადასხვა გასართობი საშუალებები სურთ.



ქალაქში საბავშვო ატრაქციონების განთავსებას აქამდე მერიის კეთილმოწყობის, ხოლო ამ დროისთვის საბინაო სამსახური ახორციელებს. მიმდინარე წელს ამ სამსახურის მიერ გამოცხადებულ ელექტრონული ტენდერით 12 ატრაქციონი დაიდგა. გასართობი საშულებების განთავსება კომპანია შპს "ჯეო პარკმა" 59 999 ლარის სანაცვლოდ განახორციელა.

სატენდერო დოკუმენტაციაში გათვალისწინებული არის ორწლიანი საგარანტო ვადა. თუმცა, ამაში არ იგულისხმება მოსახლეობის მხრიდან გამოწვეული დაზიანებები.

"ჩვენ კომპანიას ვერ დავავალდებულებთ იმას, რომ მოსახლეობის მიერ უდიერად მოპყრობის შედეგად დაზიანებული ატრაქციონები შეაკეთონ", - ამბობს მერიის საბინაო სამსახურის უფროსი, ვლადიმერ ნაკაშიძე.

მისი თქმით, იმის გამო წლების განმავლობაში არ ხდებოდა მწყობრიდან გამოსული ატრაქციონების შეკეთება, საჭირო გახდა ადგილობრივ ბიუჯეტში ახალი მუხლის "სპორტული მოედნების, სპორტული ტრენაჟორების, საბავშვო ატრაქციონებისა და საბაღე ძელსკამების ექსპლოატაცია" დამატება.

ამ პუნქტის საფუძველზე, ქუთაისის მერიამ 50 000 ლარის ღირებულების ელექტრონული ტენდერი მიმდინარე წლის მარტში გამოაცხადა. თუმცა, საბავშვო ატრაქციონების გარდა, სკამებისა და სპორტული ტრენაჟორების რეკონსტრუქციისთვის შპს "სერვის-უნივერსალმა" 38 990 ლარი მოითოხვა. სწორედ, ეს კომპანია გახდა გამარჯვებული, რომელთანაც ხელშეკრულების დადების პროცედურები მიმდინარეობს. ამის შემდეგ კი დაზიანებული საბავშვო ატრაქციონების რეკონსტრუქცია ეტაპობრივად მოხდება.