„ხელოვანს შეუძლია არ იყოს სახელმწიფოზე დამოკიდებული, ამის საშუალებას გვაძლევს ევროპა“, - ამბობს მხატვარი ირაკლი ჩოგოვაძე.

ხელოვანი, რომელიც ხელისუფლებაზე არ არის დამოკიდებული თავისუფალია მის არჩევანში ჰქონდეს ესა თუ ის პოზიცია, სათქმელი, როგორც ავტორს და ჰქონდეს საკუთარი შეხედულებები, როგორც მოქალაქეს.

მხატვრის თქმით დღევანდელ საქართველოში ხელოვანებს ეს თავისუფლება ნაკლებად აქვთ, იმიტომ რომ ბევრი მათგანი სახელმწიფოზეა დამოკიდებული, სახელმწიფო კი მათგან მოითხოვს კონკრეტულ ქმედებებს, ხელისუფლების მიმართ სიმპათიებს და სხვა იძულებებს.

ევროპასთან მეტი ინტეგრაცია ხელოვანს და კონკრეტულად მხატვარს შესაძლებლობას აძლევს დარჩეს საკუთარ პროფესიაში, მატერიალური კეთილდღეობის გამო არ წავიდეს კომპრომისზე ხელისუფლებებთან, მოაწყოს საკუთარი გამოფენები, გაყიდოს ნახატები და ამით მიიღოს ფინანსური დამოუკიდებლობა.

ჰიბრიდული დემოკრატიების და მზარდი ავტორიტარიზმის პირობებში ხელოვანები მძიმე არჩევანის წინაშე დგებიან, სადაც ცოტა თუ ახერხებს პრინციპული პოზიციის დაცვას.

ამიტომ ევროპა და ევროპული თავისუფალი სივრცე ყველაზე მეტად სწორედ ხელოვანებს სჭირდებათ, რადგან თავისუფელების ნაკლებობამ შეიძლება მოკლას შემოქმედება.