ქუთაისიპოსტი

ირკვევა, რომ სკოლის დირექტორების ნაწილს სამინისტროს ბრძანება 1 ოქტომბერსაც არ ჰქონდა მიღებული. სკოლების ნაწილში კი იციან, როგორ უნდა იმოქმედონ.

„ჩვენ გვითხრეს, რომ საკლასო ოთახში გაკვეთილზე ჩავრთავთ კომპიუტერს და ვინც ონლაინ სწავლებას გადაწყვეტს ამ ფორმით ჩაებმება საგაკვეთილო პროცესში", – ამბობს N23 სკოლის პედაგოგი, მარი ჩიტაიშვილი.

ხელისუფლებამ მოსწავლეებიც, ბუნდოვანი ლოგიკით, ორად გაყო და  რეალურ სივრცეში განათლების მიღების შესაძლებლობა მხოლოდ ნაწილს მისცა. ამის გამო,  არაერთი  მოზარდია სტრესში, რომლებსაც სწავლების სრულფასოვანი სერვისი ვერ მიეწოდება.

მეათეკლასელ კესოს ქუთაისიდან იმედები გაუცრუვდა. ის მთელი ზაფხული ელოდა, რომ სწავლა საკლასო ოთახებში განახლდებოდა. სახელმწიფოს გადაწყვეტილებამ ონლაინრეჟიმში სწავლის გაგრძელებაზე, გაუნელა ენთუზიაზმი.

მთავრობამ 15 სექტემბერს მოსწავლეებისთვის სკოლის კარი მხოლოდ მუნიციპალიტეტებისა და სოფლის სკოლებში გააღო. დიდი ქალაქები კი ისევ ონლაინ სწავლების რეჟიმში დატოვა.

თერმოსკრინინგი სოფელ ქვილიშორის საჯარო სკოლის შესასვლელთან

პირველად სწავლის გადადების გადაწყვეტილება პრემიერმა გიორგი გახარიამ ასე ახსნა:

N23 სჯარო სკოლაში  ბავშვების დასახვედრად დიდხანს ემზადებოდნენ.

საგანმანათლებლო დაწესებულებაში, რომელიც მთლიანად ახალ პროტოკოლზეა გადაწყობილი, ახალი წესები მოქმედებს:

სკოლის ეზოდან შენობამდე პირბადის ტარების აუცილებლობას არაერთი სტიკერი შეგახსენებთ. შენობაში მოხვედრისთანავე დეზობარიერზე გადაივლით.  შემდეგ სიცხეს გაიზომავთ, ხელებს იქვე დადგმული სადეზინფექციო ხსნარით დაიმუშავებთ და მხოლოდ ამის შემდეგ მოგეცემათ საშუალება შეხვიდეთ საკლასო ოთახებში, სადაც  მერხები დისტანციის დაცვითაა განლაგებული.

სკოლას მზად ჰყავს მომსახურე პერსონალიც, რომლებმაც სველი წერტილების, საკლასო ოთახებისა და სკოლის საერთო სარგებლობის ფართები, სანიტარული წესით,  ყოველი დასვენების შემდეგ უნდა დაასუფთავოს.

23-ე საჯარო სკოლის დირექტორი ნესტან სიხარულიძე მიიჩნევს, რომ სამინისტროს მიერ დაწესებული ყველა მოთხოვნა შეასრულეს და ამიტომ ახალ გამოწვევასაც გაუმკლავდებიან.

ამ მზაობაზე მიუთითებდნენ შრომის ინსპექცია და სურსათის უვნებლობის სამსახურებიც, რომლებიც აქტიურად ამოწმებდნენ სკოლებს.

9 სექტემბრის მონაცემებით, მათ 1500 სკოლიდან მხოლოდ 81 დაიწუნეს. „დაწუნებულებს“ სიტუაციის გამოსასწორებლად ვადა პირველ ოქტომბრამდე  მისცეს.

რა ხარჯი გაიღო კონკრეტულად ქუთაისმა სკოლების შერემონტებასა და ახალი სასწავლო წლისთვის მომზადებაზე, ,,ქუთაისიპოსტმა“  მონაცემები ქუთაისის მერიიდან გამოითხოვა, თუმცა პასუხი ამ დრომდე არ ჩანს.

,,თანმიმდევრულობა და ლოგიკა ძნელი გასაგებია  იმიტომ, რომ ჩვენ ვერ ვხვდებით რატომ შეჩერდა არჩევანი სკოლაზე, როდესაც ქვეყანაში ყველაფერი დანარჩენი ფუნქციონირებს მცირე გამონაკლისის გარდა. სკოლა,  განსაკუთრებით მაშინ, როდესაც ტექნიკურად აღიჭურვა  ანტიკოვიდ მოწყობილობებით, რეგულაციები შეიქმნა, რატომ გადაიდო  სრულიად გაუგებარია. თანაც გადაიდო დიდ ქალაქებში. მაგრამ დიდ ქალაქებში ჩვენ გვაქვს პატარა სკოლებიც და მაგალითად, პატარა ქალაქებსა და სოფლებში გვაქვს დიდი სკოლები.  რატომ იყო ეს პრინციპი აღებული, გაუგებარია“.

„თავის დროზე მე მგონი შეცდომა იყო სკოლის გაჩერება, როცა 12 და 15 შემთხვევა გაქვს მთელ ქვეყანაში, საზღვრები ჩაკეტილია,   გადაადგილება შეზღუდული, კომენდანტის  საათი რომ გაქვს  და დიდი ქალაქები ჩაკეტილი, რა საჭიროა  ამ სიტუაციაში  ფარცხანაყანევის ორ საშუალო სკოლაში სწავლის შეწყვეტა? ან მაგალითად, ცაგერში სწავლის გაჩერება, ან ახმეტაში, ან წალკაში, სადაც საერთოდ არ დაფიქსირებულა შემთხვევა.  ასე, ერთ თარგზე მოჭრა მთელი ქვეყნის, შეცდომა მგონია“.

სკოლაში 235 მოსწავლეა. ისინი ექვსთვიანი პაუზის შემდეგ დაუბრუნდნენ სკოლას, სადაც შეცვლილი გარემო დახვდათ. თერმოსკრინინგი და დეზობარიერები შენობის შესასვლელში, დისტანციისთვის მონიშნული ადგილები სკოლის დერეფნებსა და საკლასო ოთახებში. სადეზინფექციო ხსნარები კედლებზე და ბევრი საუბარი უსაფრთხოებაზე.

სკოლის ეზო შედარებით თავისუფალი სივრცეა, თუმცა პანდემია აქაც აღწევს, უკვე ბავშვების თამაშებში. „კოვიდობანა“, „კარანტინობანა“ – ახალი რეალობის გასართობია.

,,პროგრესის“ აღმასრულებელ დირექტორს, ნათია კილაძეს მიაჩნია, რომ ონლაინსწავლებამ  წარმოქმნა დილემა პირველი საფეხურის მოსწავლეებისთვის.

სწავლისა და სწავლების „მოუხერხებელ“ ფორმაზე მიუთითებს მასწავლებელი ანიც (მისი თხოვნით სახელი შეცვლილია).

ცალ ხელში ცარცი და მეორეში კამერა, - ასე აღწერს ანი მის სამუშაო დღეს სხვადასხვა კლასებთან. ის უკვე ათი წელია მათემატიკას ასწავლის. თუმცა ცოდნის გადაცემაში ასეთ სირთულეს, რაც ონლაინსწავლების პერიოდში დაინახა, ჯერ არ გადაწყდომია.  იგი ონლაინრეჟიმში სწავლების ჩრდილოვან მხარეზე ლაპარაკობს და ცოდნის ნორმალურად გადაცემის პრაქტიკულად შეუძლებელ პროცესზე მიუთითებს.

მასწავალებელი აღნიშნავს, რომ ვინც ონლაისწავლების სრულფასოვან მხარეებზე საუბრობს, ცრუობს.

„ვინც ამას იწონებს მხოლოდ ქულების დასაწერად ამბობს ამას. მოსწავლის ინტერესებიდან არავინ გამოდის“.

მისივე თქმით, სკოლები ადგილობრივად, მხოლოდ იმ ტერიტორიაზე უნდა დაიხუროს, სადაც კორონავირუსის გავრცელება ინტენსიურია. იმ სკოლებში კი, რომლებიც იხსნება, უსაფრთხოების დაცვაა პრიორიტეტი.

სკოლების დახურვის მავნე და მძიმე შედეგებზე მიუთითებს UNICEF-იც.

სკოლების გლობალური დახურვა COVID-19-ის პანდემიის საპასუხოდ, უპრეცენდენტო რისკს შეიცავს ბავშვების განათლების, დაცვის და კეთილდღეობის კუთხით.

,,განათლების მომსახურების შეწყვეტას ასევე სერიოზული, გრძელვადიანი ცუდი შედეგები მოაქვს ეკონომიკასა და საზოგადოებებში, ზრდის უთანასწორობას, ამცირებს სოციალურ ერთობას და მოაქვს ჯანმრთელობის პრობლემები,“ –  აღნიშნავენ გაეროს ბავშვთა ფონდში.

***

„დეტალურად ვაკვირდებით დინამიკას. გამოცხადებული თარიღები შერჩეულია ადაპტაციის პროცესების ეტაპების გათვალისწინებით. რაც შეეხება მე-7-მე12 კლასის მოსწავლეებს მათ შესახებ ახლო მომავალში დამატებით გავაკეთებთ განცხადებას“, -ამბობს განათლების მინისტრი მიხეილ ჩხენკელი.

არადა, კორონავირუსით გამოწვეული პანდემიიდან თითქმის ერთი წლის თავზე, მსოფლიომ პრაქტიკულად მხოლოდ ის გაარკვია, რომ მომავალში ყველას კორონავირუსთან თანაცხოვრება მოუწევს.