სახალხო დღესასწაულის "ჭიათურობა 2016" ღონისძიებები დილიდან დაიწყო.

ქალაქის ცენტრალურ ქუჩებში ადგილობრივი მუნიციპალიტეტის წარმომადგენლებთან და მოქალაქეებთან ერთად სახალხო მსვლელობა გაიმართა.

მოგვიანებით, ეთერ სამხარაძის სახელობის სკვერში დაგეგმილია კონცერტი.

დღის 13:00 საათიდან ღონისძიებების ძირითადი ნაწილი ნინოშვილის ქუჩაზე დაიწყება, სადაც სკოლის მოსწავლეთა ნამუშევრებისა და პროფესიონალთა გამოფენა "შემოდგომის ზეიმი" გაიმართება.

ასევე, მოეწყობა საესტრადო და სპორტულ-სამეჯლისო ანსამბლების კონცერტი.

მოგვიანებით, ღონისძიებები თხელიძის ქუჩაზე გადაინაცვლებს, სადაც ჭიათურის მუნიციპალიტეტების სოფლები თავიანთი კულტურისა და შემოქმედების ნიმუშებს წარმოადგენენ.

საღამოს 17:00 საათზე ადგილობრივი და მოწვეული შემსრულებლები კონცერტს გამართავენ.

ღონისძიებებს ფოიერვერკი დაასრულებს.