ჭიათურაში, საკრებულოს სხდომაზე, რომელსაც გაფიცული მაღაროელებიც ესწრებოდნენ, მედიის წარმომადგენლები არ შეუშვეს.

სხდომის გასაშუქებლად მისულ ჟურნალისტებს, ოპერატორებს და ფოტოგრაფებს დაცვის წარმომადგენელმა უთხრა, რომ ადგილი აღარ იყო და სხდომას ვერ დაესწრებოდნენ. მაშინ როცა კანონით, საკრებულოს სხდომა საჯაროა და დასწრების უფლება ნებისმიერ ადამიანს აქვს.

რატომ არ დაასწრეს მედიის წარმომადგენლები საკრებულოს სხდომას, რომელიც საჯაროა, ამის გარკვევა პრესსამსახურთან ვცადეთ, თუმცა მარიკა ხვედელიძემ ჩვენს სატელეფონო ზარებს არ უპასუხა. 

საკრებულოს სხდომაზე მაღაროელებმა მერს სამმხრივ კომისიაში მათი ჩართულობის აუცილებლობაზე მიმართეს და ცენტრალურ ხელისუფლებასთან შუამდგომლობა სთხოვეს.

ჭიათურაში პროტესტი 28 თებერვლიდან მიმდინარეობს. მაღაროელები სამი თვის სახელფასო დავალიანების გასტუმრებას, მადნის მომპოვებელი კომპანიის "ჯორჯიან მანგანეზისთვის" ლიცენზიის ჩამორთმევას და საწარმოების სახელმწიფოს მართვაში გადაცემას ითხოვენ.

1 აპრილს მაღაროელები პროტესტის 24 საათიან რეჟიმზე გადავიდნენ და ჭიათურის მერიის შენობასთან ორი კარავი გაშალეს, 4 აპრილიდან კი შიმშილობა დაიწყეს.