"ქართული ოცნების" პარლამენტმა, სისხლის სამართლის კოდექსში, სამშობლოს ღალატის მუხლის დამატებას საბოლოო, მესამე მოსმენით მხარი დაუჭირა.

ცვლილებების მომხრე 86 დეპუტატი იყო, წინააღმდეგი კი - არცერთი.

"ოცნების" დეპუტატების ინიციატივით, სისხლის სამართლის კოდექსში დაბრუნა „სამშობლოს ღალატის“ მუხლი, რომელიც 2007 წელს გაუქმდა, თუმცა ყველაფერი, რასაც ეს მუხლი ითვალისწინებდა, კვლავინდებურად დასჯადია.

"ქართული ოცნების" გადაწყვეტილებით, სამშობლოს ღალატად შემდეგი ქმედებები ჩაითვლება:

საქართველოს ტერიტორიული ხელშეუხებლობის დარღვევა;

ანტიკონსტიტუციური ხელშეკრულების დადება ან მოლაპარაკების წარმოება;

საქართველოს საგარეო უშიშროების ხელყოფა;

უცხოეთის სადაზვერვო სამსახურში შესვლა;

საქართველოს თავდაცვისუნარიანობის ხელყოფა;

სახელმწიფო საიდუმლოების გაცემა;

ჯაშუშობა;

შეთქმულება ან ამბოხება საქართველოს კონსტიტუციური წყობილების ძალადობით შესაცვლელად;

საბოტაჟი;

უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება.

2007 წლის აპრილამდე საქართველოს სისხლის სამართლის კოდექსის 307-ე მუხლი განსაზღვრავდა „სახელმწიფოს ღალატს“, ახლა კი ამ მუხლს „სამშობლოს ღალატი“ ერქმევა.

ამავე თემაზე:

„ოცნების“ გადაწყვეტილებით, სისხლის სამართლის კოდექსს „სამშობლოს ღალატის“ მუხლი დაემატება