ამბროლაურის მუნიციპალიტეტის სოფელ კლდისუბნის ძველი დასახლების ტერიტორიაზე მეწყრული პროცესები გააქტიურდა.

ამის შესახებ ინფორმაციას ამბრლაურის მუნიციპალიტეტი ავრცელებს.

მათივე ცნობით, ადგილზე იმყოფებოდნენ დარგის სპეციალისტები და ინჟინერ-გეოლოგები, რომლებმაც შეაფასეს სიტუაცია და განსაზღვრეს პროცესის შემდგომი რისკები.

"ვიზუალური დათვალიერების შედეგად დადგინდა, რომ მეწყერი არ წარმოადგენს საშიშროებას დასახლებული პუნქტისთვის. გაიცა შესაბამისი რეკომენდაციები, რომლებიც დაუყოვნებლივ შესრულდა, ხოლო ტერიტორიაზე განხორციელდა გაწმენდითი სამუშაოები",- აღნიშნულია მუნიციპალიტეტის განცხადებაში.

მათივე ინფორმაციით, მოსახლეობის უსაფრთხოების უზრუნველსაყოფად და მეწყრული პროცესების პრევენციის მიზნით, აღნიშნულ ტერიტორიაზე მონიტორინგი პერიოდულად ჩატარდება.