გარემოს ეროვნული სააგენტოს მოკლევადიანი პროგნოზების სამმართველოს უფროსის დოდო გვაზავას ინფორმაციით, 1 მაისამდე, ქუთაისსა და იმერეთის რეგიონში, უმეტესად, უნალექო ამინდია მოსალოდნელი.
მისივე თქმით, ღამისა და საღამოს საათებში, შესაძლოა, გაწვიმდეს. ამასთან, ჰაერის ტემპერატურა წინა დღეებთან შედარებით 2-3 გრადუსით დაიკლებს.

„1 მაისს კვლავ მოიმატებს ჰაერის ტემპერატურა 29-31 გრადუსამდე. 2 მაისს ცივი ჰაერის მასები შემოდის შავი ზღვის ჩრდილო-დასავლეთიდან, ამიტომ 2-დან 5 მაისის ჩათვლით და შემდეგ დღეებშიც არამდგრადი ამინდებია მოსალოდნელი. უმეტეს რაიონში დროგამოშვებით იწვიმებს, შესაძლებელია ელჭექიც და დასავლეთის მიმართულების ქარის გაძლიერება“,- განმარტავს დოდო გვაზავა.

მისივე თქმით, ჰაერის ტემპერატურის მკვეთრი დაკლება 3 მაისს-5 მაისსაა მოსალოდნელი. ამ დღეებში 23-24 გრადუსი დაფიქსირდება.