დღეიდან, 12 ოქტომბრიდან, რიკოთის უღელტეხილზე დაწესებული ავტოტრანსპორტის მოძრაობის სპეციალური რეჟიმი იცვლება.
კერძოდ, საავტომობილო გზების დეპარტამენტის ინფორმაციით, სპეციალური რეჟიმი 
მსუბუქი და სამგზავრო ავტოტრანსპორტისთვის უქმდება. შესაბამისად, რიკოთის საუღელტეხილო გზაზე მათი გადაადგილება დღე-ღამის ნებისმიერ მონაკვეთში იქნება შესაძლებელი. 

მისაბმელიანი და ნახევრად მისაბმელიანი ავტოტრანსპორტისთვის კი გადაადგილების სპეციალური რეჟიმი ძალაში დარჩება, თუმცა გაიზრდება 4 საათით.

კერძოდ, მისაბმელიანი და ნახევრადმისაბმელიანი ავტოტრანსპორტის გადაადგილება რიკოთზე დაშვებული იქნება ორმხრივად, 21:00 საათიდან 07:00 საათამდე.

უწყების ცნობითვე, რიკოთის საუღელტეხილო მონაკვეთზე 24 საათიანი მონიტორინგი კვლავ გაგრძელდება. 

საავტომობილო გზების დეპარტამენტში განმარტავენ, რომ რიკოთის საუღელტეხილო გზის 
149-ზე კმ-ზე ფერდის სტაბილიზაციის საპროექტო სამუშაოები უკვე დასრულდა და დაიწყო მოსამზადებელი სამშენებლო სამუშაოები.

სპეციალური რეჟიმი რიკოთის საავტომობილო გზაზე მიმდინარე წლის აპრილიდან მოქმედებს.