ყაზახურმა დაბალბიუჯეტურმა ავიაკომპანია FlyArystan-მა ალმათიდან ქუთაისის მიმართულებით პირდაპირი რეგულარული რეისების განხორციელება დაიწყო.
ალმათი მეხუთე ყაზახური ქალაქია, საიდანაც, ქუთაისის საერთაშორისო აეროპორტში, ფრენები კვირაში ორჯერ, ოთხშაბათსა და კვირას სრულდება.

პირველ რეისს ყაზახეთიდან 175 მგზავრი ჩამოჰყვა.​

„FlysArystan-ი ქუთაისის საერთაშორისო აეროპორტში ოპერირებას კიდევ უფრო აძლიერებს. ალმათი – სრულიად ახალი, მეხუთე მიმართულება დაემატა უკვე ჩვენს აეროპორტს, რითიც ქუთაისიდან, ფაქტობრივად, სრულად დაიფარება ყაზახეთის ქალაქები.

ცენტრალური აზია ახალი მიმართულებაა ქუთაისის აეროპორტისთვის და ზოგადად, იმერეთის მხარისთვის. FLyArystan-ის წარმატებულმა მაგალითმა აჩვენა, რომ ჩვენი რეგიონი ყაზახეთისთვის ძალიან საინტერესო, სტრატეგიულად მნიშვნელოვანი და მიმზიდველი მიმართულებაა. ზაფხულში ავიაკომპანია ქუთაისის მიმართულებით ყაზახეთიდან კვირაში 15 სიხშირით იფრენს“, – განაცხადა აეროპორტების გაერთიანების დირექტორმა ირაკლი ქარქაშაძემ.

ალმათის გარდა, FLyArystan-ი ქუთაისში, პირდაპირ რეგულარულ ფრენებს დედაქალაქ ასტანადან, ატირაუდან, აქტაუდან და შიმკენტიდან ასრულებს. 

2022 წლის მონაცემებით, ავიაკომპანია ქუთაისის საერთაშორისო აეროპორტში 135 000 მგზავრს მოემსახურა.