ზურაბ ჟვანიას სახელობის სახელმწიფო ადმინისტრირების სკოლაში, "საქართველოს საჯარო სკოლების ოპერირებისა და მოვლა-პატრონობის" შესახებ ტრენინგს საქართველოს სხვადასხვა რეგიონის 330-მდე წარმომადგენლი გაივლის.
ტრენინგ-კურსი 4 ნაკადად ჩატარდება.

როგორც სკოლის ადმინისტრაციაში განმარტავენ, პროგრამით გათვალისწინებული სწავლება სავალდებულოა იმ პირთათვის, რომლებსაც უშუალო შეხება აქვთ საჯარო სკოლების ოპერირებასა და მოვლა-პატრონობასთან: კერძოდ, საჯარო სკოლების დირექტორები, საგანმანათლებლო რესურსცენტრებისა და მუნიციპალიტეტების მერიის წარმომადგენლები, რომლებიც უშუალოდ ჩართულნი არიან საჯარო სკოლების ინფრასტრუქტურის მოწესრიგებასა და განვითარებაში.

"ტრენინგ-კურსის მიზანია ყველა იმ სტანდარტის, ტექნიკისა და მექანიზმის გაცნობა, რომელიც საჭიროა ოპერირებისა და მოვლა-პატრონობის ფუნქციის თითოეული კომპონენტის წარმატებით განსახორციელებლად და მისი მიზანია საჯარო სკოლებში უსაფრთხო, ჯანსაღი, მიმზიდველი გარემოსა და სწავლების ხარისხის გაუმჯობესება", - ამბობენ სკოლაში. 

"საქართველოს საჯარო სკოლების ოპერირებისა და მოვლა-პატრონობის" პროექტში ჩართულია 127 სკოლა, 44 მუნიციპალიტეტი და 44 საგანმანათლებლო რესურსცენტრი.

"ათასწლეულის გამოწვევის ფონდი - საქართველო" განათლების სამინისტროს მმართველობის ქვეშ შემავალ სიპებთან: საგანმანათლებლო და სამეცნიერო ინფრასტრუქტურის განვითარების სააგენტოსთან და ზურაბ ჟვანიას სახელობის სახელმწუფო ადმინისტრირების სკოლასთან თანამშრომლობით ახორციელებს.